AP : Pawisa dil ṭhinte avangin MoRTH office sawn

Ministry of Road Transport and Highways (MoRTH) chuan Itanagar aṭanga Tezpur, Assam-a an regional office an sawn chhan chu Arunachal Pradesh-a union leh pawl ang chite'n pawisa an dil nasat ṭhin vang a nih thu an sawi.

MoRTH tarlan danin, heng pawlte hian donation anga sawiin ṭanpuina leh thawh tur pawisa an dil reng ṭhin thu leh, chu chuan ni tina an hnathawh a tihbuai ṭhin thu an sawi. MoRTH regional office superintending engineer chuan,"Union leh pawl hrang hrang an awm a, a huhoa chea thil ti ṭhin tam tak an awm bawk, hengho hian donation tiin pawisa an rawn dil ṭhin a ni. Heng pawla telte hian office rawn tlawh foin, ni tina kan hnathawh an tibuai ṭhin em em a ni," tiin a sawi.

Hetih lai hian All Arunachal Contractors Welfare Association (AACWA) president, Nabam Akin Hina chuan Tezpur-a office sawn a nih avangin contractor-te tan official te thu lak leh bill kaihhnawih thlenga an tana harsatna a thlen thu sawiin, Itanagar leh Tezpur inkar chu km 250 zet a nih avanga an tana veivah a hautak thu MoRTH hnenah hian a thlen. AACWA chuan Arunachal ṭhalaite chu donation a ni emaw pawisa chungchang hrim hrimah central office, state office leh hnathawhna atana buatsaih hmunte tlawh lo turin an hriattir a, state sorkar leh sorkar thuneitute chu he harsatna chingfel a, MoRTH regional office chu Tezpur aṭanga sawn let a nih leh theihna tur atana pui turin an ngen bawk.