LGP phurtuten nawrh an titawp

Hmarchhak biala eirawngbawlna gas cylinder phurtu pawl, North East Packed LPG Transporters Association (NEPLTA) in tiam chin awm loa nawrh an huaihawt chu Inrinni tlai dar 4 khan a titawp.

Nawrh tihtawp a nih tak avangin hmarchhak biala state pali - Assam, Meghalaya, Mizoram leh Arunachal Pradesh-ah gas cylinder-te phurh chhuah leh nghal a ni.

NEPLTA president Niranjan Mahanta chuan, 'Rass leh festival dang dang awm avanga mipuiten harsatna nasa tak an tawh chhoh vangin thla khat chhung atan nawrh tihtawp rih hi kan rel a ni. LPG cylinder a awm loh avangin gas agency-ten buaina nasa tak an tawk a, hei vang hian kan thil phutte tihlawhlting turin IOCL chu thla khat hun kan pe leh ta a ni. Hemi chhunga an tihlawhtling thei lo a nih chuan nawrh hi kan chhunzawm leh nghal ang," a ti.

NEPLTA hian an hlawh tihtan sak pe tur leh, tender tihchhuah thara rate tihhniam a ni chu duh loin, December 4 aṭang khan tiam chin awm loin nawrh hi an huaihawt a ni. Nawrh huaihawtnaah hian hmar chhak biala gas cylinder phurtu 1,500 chuang an tel.

Mahanta chuan, "Indian Oil Corporation Ltd (IOCL)-a Assam Oil Division (AOD) high official-te meeting kan neihpui a, kan thil phutte ngaihtuah an intiam avangin nawrh tihtawp lailawk hi kan rel ta a ni," a ti.

IOCL hnuaia Assam Oil Division (AOD) hian an bottling plant 10 aṭangin nitin LPG cylinder nuai 1.4 an siam a, hei hi hmarchhak state-te chawmtu a ni. Heng zinga bottling plant parukte hi NEPLTA nawrh hian nghawngin, heng bottling plant aṭang hian LPG cylinder nuai 1.1 siam chhuah a ni.