Manipur : Naga hmeichhia rukbo thubuaiah mi 9 lakah chargsheet thehlut

Central Bureau of Investigation (CBI) chuan Manipur-a tualchhung buaina a chhuah hnu, kumin July thlaa Naga hmeichhia, kum 55 mi rukbo leh thah thubuai kaihhnawihah kar liam tak khan mi pakua lakah chargesheet a thehlut.

Official-te chuan chargesheet hi Guwahati-a Special CBI court-ah thehluh a ni tih sawiin, Supreme Court hriattirna angin hetah hian he thubuai ngaihtuah a ni ang. CBI chuan he thubuai hi chhui zui mek a nih thu an sawi a, mahse chargesheet an siamsakte hming erawh an tarlang lo.

CBI-in a tarlan danin, July 15 chhunah Naga hmeichhe pakhat chu Sawombung Gate-a mipui pungkhawmin an dang bet a, an zingah hian ralthuam kengte pawh an tel. Hemi ni vek khan he hmunah he hmeichhe ruang hi hmuh a ni.

Police-ten mi rubotute an man

Manipur police-te chuan Inrinni khan misualten an ruk bo, kum 22 mi Laishram Chinglen Singh an chhanchhuak a, a rubotu nia puh mi pariatte an man bawk.

Laishram Chinglen Singh hi Zirtawpni tlai khan Imphal-a DM College of Science New Boy's Hostel aṭangin rukbo a ni a, a rutute hian a nu leh pate hnenah Rs nuai 15 an phut a ni. Hemi hnu hian a nu leh pate chuan police-ah complaint thehlutin, Imphal West District police-ten an chhui zui nghal a, Inrinni tlai dar 2 vel khan Yumnam Huidrom Makha Leikai-a Asem Chaova in an dapnaah hmuin an chhanchhuak ta a ni. Amah rutu mi pariatte kut aṭang hian Ghatak rifle, AK-47 rifle pakhat, .32 pistol pakhat, a mu leh mobile handset 13 an man tel a ni.

Vatican ambassador-in relief camp tlawh

India-a Vatican City ambassador, Apostilic Nuncio HE Most Rev Leopoldo Girelli chuan ni li chamin Manipur a tlawh. Imphal East-a relief camp a tlawh a, he hmuna awmte hnenah chhawmdawlna a sem nghal bawk.

HE Most Rev Leopoldo Girelli hian camp-a awmte hi kawmin, an state-in tualchhung buaina nasa tak an tuar chu pawi a tih thute a sawi. Apostolic Nuncio hian Manipur mipuite tana a ṭawngṭaisak zel tur thu leh, tharum thawhna thlengte a tawp a, remna leh muanna a awm theih thuai a bsiesi thu a sawi. Kar liam ta Zirtawpni khan Senapati district-a Imphal Archbishor thar atana Rev Dr Linus Neli nemnghetna hun pawh a hmanpui bawk a ni.