Tripura : 2024 inthlan atan BJP in hma la ṭan

Tripura-a rorellai BJP chu nakkuma Lok Sabha inthlanpui neih tur atan an inbuatsaih ṭan a, tribal area aṭangin hma an la dawn.

2023 assembly inthlanah khan BJP hian tribal area-a seat 20 awm aṭangin seat sarih chauh an la pha a, regional party ding thar TIPRA Motha chuan seat 13 zet a la pha thung. Hei vang hian Lok Sabha inthlan lo awm turah ṭan lak chhoh an tum a, tribal area-a an party dinhmun leh, hma lak dan turte ngaihvena information lakhawm turin hruaitu 20 an ruat a ni.

Senior party leader chuan, " Hetianga hma kan lakna hi inthlanah pawh a ṭangkai a hlawhtling hle zel tih kan lo hre tawh a ni. Area pawn lam mi chu 'Bistarak' atan ruatin, ani hian ni nga chhung a constituency a tlawh tura tih chu va cham chilhin a zirchiang ang. Party worker-te kawmin, hemi hnu hian party state president hnenah report thehlutin, election campaign kalpui dan tura a ruahmante a hrilh dawn a ni," a ti. Tribal seat puala Bistarak an ruatte bakah, a thawh hnihnaah assembly seat dang 40 tan pawh an ruat leh ang.