NEHU Convocation-ah HRD minister

Human Resources and Development Minister Smriti Irani chuan Thawhlehni khan North Eastern Hill University (NEHU) 23rd Convocation programme a hmanpui. Minister chuan NEHU-ah hmarchhak biala cheng hnam hrang hrangte history, culture leh philosophy zirna tur bik deparment hran siam a nih tur thu a sawi.

Union minister chuan NEHU-ah hian Scheduled Caste, Scheduled Tribe leh Minority bakah hmeichhia te tan civil service-ah tam zawk an luh theih nan leh NET exam tum te tan Coaching Centre hawn a nih tur thu a sawi. Hmarchhak chu tribal te chenna hmun a nih avangin tribal culture, history leh philosophy zirna hran siam hi a ṭul a ni a ti a, hemi atan hian NEHU vice-chancellor nen pawh inbiakna an nei tawh a ni.

Irani chuan, history, culture leh philosophy zir chu thil a tak a ni tiin, hetiang zirna tur a awm thei tur chu lawmawm a tih thu a sawi. He zrina hian India ram mai nilo khawvel hmun dang aṭang pawhin zirlaite a hip ngei a rin thu a sawi a, hmarchhak state te socio, economic, political leh cultural history te chu zirchian chakawm tak a ni, a ti bawk.

NEHU chu India rama Central University changtlung leh upa ber te zing a mi a ni a, kawng tam takah University dangte tan pawh entawnna tur tam tak a awm a ni, tiin Irani chuan a sawi. Ph.D leh zirna sang zawk chhunzawm duh hmeichhia leh rualban lote tan ruahmanna thar siam a ṭul thu a sawi a, University Grants Commission (UGC) chuan heng mite tan hian hma a la mek a ni a ti bawk. M.Phil zir chhung kum hnih chu hmeichhia leh rualbanlote tan kum thum-ah siam a ṭul thu te, maternity leave thlenga ngaihnathiamna pek an tul thu minister chuan a sawi.

Irani hian Olympian leh world boxing champion vawi nga lo ni tawh MC Mary Kom leh Union Public Service Commission-a hmeichhe chairperson hmasa ber Ros Millian Bathew-te hnenah honorary degree a hlan nghal bawk.