Gogoi-a lakah thubuai thehlut

Assam Chief Minister Tarun Gogoi chu Arunachal Pradesh Governor JP Rajkhowa chungchang nikum December 19-a press conference-ah mawi lo taka a sawi avangin a lakah thubaui ziah luh a ni.

Guwahati High Court, Itanagar Permanent Bench Advocate Osong Saroh chuan Gogoi-a lakah hian Itanagar police station-ah Thawhṭanni khan FIR a thehlut. Gogoi hian ṭawngkam mawilo tak leh midang rilru hruai kawi thei ṭawngkam a chhak chhuak niin tarlan a ni a, a ṭawngkam hman hian section 189 IPC, 503 IPC, 504 IPC, 505 (1)(b)(C)(2) IPC AND 506 IPC a bawhchhia ni a tarlan a ni.

Assam CM hian Arunachal Pradesh Governor JP Rajkhowa chetdan chu na takin a sawi sel a, BJP agent leh RSS tana thawk ang hialin a chhuah. Raj Bhawan chu RSS office-ah a chantir ang hialin Gogoi chuan a sawi niin tarlan a ni bawk. Gogoi laka thubuai ziahluh hi President, Prime Minister, Union Home Minister te hnenah a copy thawn tel a ni.