KMSS-te che chhuak ve leh dawn

Krishak Mukti Sang-ram Samiti (KMSS) te chuan Assam inthlanpui lo awm turah campaign-a chet chhuah an tum thu an sawi. KMSS te hi BJP do zawngin an che dawn a, an hming lemah Congress 'B' an vuah.

KMSS adviser Akhil Gogoi chuan Congress vote tura mipuite sawmna leh BJP vote lo tura ngenna lehkha chu a tlem berah nuai 25 tal sem chhuah a nih tur thu a sawi.

Akhil Gogoi chuan, "Kum 2014 Lok Sabha election-ah khan Modi chuan BJP an chak chuan Assam-a hnamdang khawsa mekte hnawh chhuah a nih tur thu min tiam a, amaherawh chu sorkar laipui chuan Bangladesh aṭanga lut Hindu mi nuai 22 te tan chenna tur a ngaightuahsak ta zawk a ni," a ti.

Sorkar laipuiin Aruna-chal Pradesh-a tuikhuah lian tak siam a tum chuan an tar harsatna a thlen thei a ni, a ti bawk. Akhil chuan BJP-in sorkarna an siam a nih chuan state chhunga hnam hrang hrangte inpumkhatna chuan a tawrh phah thei dawn niin a sawi a, chu chu BJP manifesto 'vision docu-ment' chuan a tichiang hle niin a sawi a ni.

Hetih lai hian BJP lam chuan KMSS te campaign chuan nghawng a neih vak an rin loh thu leh BJP-AGP-BPF te ṭangkawp tan hlauh thawnna tur a awm lo niin an sawi a. Akhil chu kum 2011 Assembly election leh 2014 Lok Sabha election-ah te Congress dodal zawnga che niin an puh bawk.