Nagaland : Hornbill festival a ṭiak ta

Nagaland khawpui, Kohima-a Naga heritage village, Kisama-a Hornbill Festival, 2023 hman chu Pathianni khan khar a ni ta. Festival tawp niah hian mi sang chuangin an chhim. Hornbill festival hi December 1 khan hman ṭan niin ni 10 chhung a awh a ni.

Festival tawp niah hian US consul General, Melinda Pavek chuan thu sawiin, Naga tribal 17 te aiawh telna, Hornbill festival buatsaih a ni chu Nagaland danglamna leh hnam kalphung vawnhimna kawng ṭha tak a nih thu leh, mimalin dikna leh chanvo a neihte tarlanna ṭha tak a ni tih a sawi.

Pavek chuan,"December 10, 2023 hi ni danglam bik tak a ni a, khawvel huapa human rights puanzar a nih aṭanga kum 75-na chiah a nih vang a ni. He hun hian mihring kan nihna anga chanvo kan neih, eng vang maha danglam thei lote chu khai khawmin, Hornbill festival hi India leh hmarchhaka chutiang ang kengkawh thei kut hmasa ber ni mah se, a tawpna erawh a ni dawn lo a ni," tiin, an ram, United State-a tribal hnamte nek chep a, an tihsual avanga tho chhuak leh tur an awm lo chu pawi a tih thu a tarlang.

British deputy high commissioner, Andrew Flemming pawhin Hornbill festival chuan Naga hnam leh an nunphung a pholan chian thu te, British ang pawha Nagaland nena inzawmna ṭha tak neih theih a beisei thu a sawi. Flemming chuan Nagaland-in khualzin hip tura hun leh theihna ṭha tak an neih thu te, Nagaland-a rimawi tum thiamte leh UK-a mi te pawhin nakinah chuan thawhhona an la neih theih a beisei thu a sawi.

Nagaland tourism minister Temjen Imna Along chuan tawpna thuchah sawiin, festival hmanga kal zawng zawngte chuan ṭhian ṭha an chhar haw ṭheuh a beisei thu a sawi a, festival chhima kal zawng zawngte hnenah Nagaland tana state pawna an palai ni tur leh, nakkum, Hornbill festival vawi 25-na lo awm turah pawh tel leh ṭheuh turin a sawm bawk a ni.

Kumin Hornbill festival hi chhimtu mi 1,54,057 awmin, heng zingah hian foreigner 2,108 leh, state dang aṭanga kal 37,089 an awm niin Directorate of Tourism-a Economics & Statistics officer, Sedevizo Ziephru chuan a sawi. Kum 2022 aiin kumina foreign tourist awm zat hi a let dawnin an pung.