Assam-a hri kai hmuh zinga 48% dawn Ni 16 chhunga hmuh chhuah an ni

Assam-a coronavirus kai hmuh chhuah tawh chu mi 76,875 an tling tawh a, hri kai zinga 47.62% chu ni 16 liam ta chhunga hmuh chhuah an ni. 

Health department-in a tarlan danin, August 1 - August 16 chhung khan state chhunga Covid-19 kai 36,606 hmuh chhuah an ni a, Pathianni bik han hri kai 1,317  hmuh belh leh an ni bawk. 

Health minister Himanta Biswa Sarma chuan Pathianni khan sample 20,367 enfiah a nih thu sawiin, heng zinga 6.46% chu a positive tih a sawi. Hemi ni vek hian mi pasarih chu Covid-19 vangin an thi a, an state-a hripui thihpui hi mi 189 an tling tawh. August 1 hnu lamah mi 91 an thi tawh a ni. 

Assam sorkar chuan an state-ah hri kai an pun belh zel avangin Covid-19 kaite enkawlna hmun siam belh a tum. Health minister chuan Covid Care Centre pathum chu hman theih tura peih thuai a ni dawn tih sawiin, Guwahati-a Nehru Stadium-ah khum 850 awmna siam a ni dawn a, Mirza COVID Care Centre-ah khum 704 awmna leh, Guwahati-ah hmeichhia leh naupang bik enkawlna turin khum 40 awmna siam a ni dawn bawk a ni, a ti.