Dalai Lama-a'n ni 3 cham turin Sikkim a thleng

Tibet-a sakhaw hotu ber, Dalai Lama, a hming tak, Tenzin Gyatso chuan nimin khan ni thum cham turin Sikkim a thleng. Sikkim-a a cham chhung hian "Thirty-Seven practices of Bodhisattvas" zirtirna a nei dawn a ni.

Dalai Lama hi October thla khan Sikkim tlawh tura ruahman ni mah se, Sikkim tuilian avangin a lo ṭhulh tawh a ni.

Tun ṭum hi kum 13 hnua Sikkim a kal leh vawi khatna a ni a, Libing army helipad-ah ṭumin, chief minister Prem Singh Tamang chuan a lo hmuak a ni. State chhung monastery hrang hranga sakhaw puithiamte, Tibetan Parliament aṭanga tlan chhia Sikkim-a awm ta te, Tibetan settlement office leh Local Tibetan assembly aṭanga member kalte'n lo hmuak bawkin, Buddhist sakhaw lam leh ṭawngṭaina an tih, 'Sherbang' chu entir a ni.

Vawiin hian Thirty-Seven practices of Bodhisattvas zirtirna a nei dawn a, he hun hi India leh China ramria awm, Nathula-a Paljor stadium-ah neih a ni ang. Gangtok SP, Tenzing Loden Lepcha chuan mi 40,000 vel an pun khawm an rin thu a sawi. Hei bakah hian Sikkim-a a cham chhung hian Rumtek-a Karmapa Park project lungphum chu a phum dawn a, Simmik Khamdong-a Gyalwa Lhatsun Chanpo statue a hawng bawk ang. Sikkim aṭang hian Ningani zingah West Bengal, Siliguri a pan leh dawn a ni.