AP : Bomdila-ah seismology observatory hawng

Union minister of earth sciences, Kiren Rijiju chuan Pathianni khan Arunachal Pradesh-a Bomdila-ah Permanent Seismological Observatory a hawng. Observatory hi Bomdila Government College-ah bun niin, he lai hmun hi seismic zone V-a awm a ni.

Permanent Seismological Observatory hi National Centre for Seismology leh Ministry of Earth Science te thawk dunin an buatsaih a ni a, he observatory hian helai hmuna leilung chet nasat dan kimchang zawka zir theih leh, lei pawn lang leh lei chhung lama leilung chet nasat theih dan dinhmun tarlang thei tura beisei a ni.

Rijiju chuan Department of Earth Sciences ṭangkaina leh thawh hlawkzia tarlangin, observatory din chu lirnghing hriat nana a ṭangkai theih tur thu leh, chhiatna nasa zawk pumpelh tura a puih theih tur thu a sawi. Sorkarin khawl changkanna hrang hrang hmanga thuam chakna tur ruahmanna a neih te tarlangin, West Kameng district-a Doppler radar system bun a tum te chu a sawi lang bawk. Ruahmanna an neihah chuan khaw chin dik taka hrilh lawk theih te, boruak hnawn leh lum lam tur te hriat lawk a, chu chuan loneitute thlai chin kawngah a puih nasat theih tur thu a sawi bawk.

Hetih lai hian Centre for Earth Sciences & Himalayan Studies (CES&HS), Arunachal Pradesh sorkar leh Centre for Seismology (NCS), Ministry of Earth Science chuan he lai biala an hmalaknate kalpui theihna tur hian Memorandum of Understanding (MoU) an ziak nghal a ni. Hemi peng pakhat atan hian Rijiju hian official website tlangzarh nghalin, hei hi Arunachal Pradesh hmun hrang hranga station an din aṭanga meteorological data dik tak inpek theihna tur atana tih a ni.