Zirlai raltlante tan Manipur university-in a theihtawp a chhuah : Union Minister

Manipur tualchhung buaina avanga zirlai eng emaw zatin an in leh lo tlansan a, zirna an chhunzawm theih loh chungchangah Manipur university-in a theih ang anga heng zirlaite tana ruahmanna a siam thu leh, hma a lak thu Minister of state for education Subhas Sarkar chuan Lok Sabha-ah a tarlang.

Union Minister Subhas Sarkar chuan zirna chu state leh central khawih, concurrent list-a awm a nih thu sawiin, Manipur university chuan zirlai raltlante tana an zirna chhunzawm tura hma a lak thu leh, online class leh state chhunga college remchangah offline-a zirna chhunzawmte an phalsak thu a sawi. Manipur MP, Lohro S. Pfoze chuan Lok Sabha-ah hian sorkar laipuiin eng angin nge Manipur tualchhung buainain a nghawng avanga zirlai raltlante tan ruahmanna a neih tih leh eng zat chiah nge zirlai tlanchhia awm tih a zawt a ni.

Sarkar chuan,"Manipur university hian university website-ah class note te a upload ṭhin a, email leh Whatsapp hmangte'n study material te thawnin, Google classroom a buatsaih bakah call hialte pawhin zirlaite a ngaihven a ni. Hei mai hi ni loin, affiliated college-a zir an nih chuan an mark khawl tawh sate chhawm phalsak an ni a, affiliated college vekah an zir chhunzawm theih dawn bakah, state chhunga an district huam chhunga an college duh berah an zir chhunzawm theih phah dawn bawk a ni," tiin a sawi.

Manipur University EIMI Welfare society chuan kar hmasa khan Supreme Court-ah Manipur state pawnah zirlai 284, central university hnuaia an zirna chhunzawm tur dah ngai an awm thu a lo hrilh tawh bawk a ni.