Assam : Smuggler-te nena inzawmna nei police 5 hrem

Assam-a Cachar district-a kuhva rah tawlh ṭhinte nena inzawmna nei nia hriat, Assam police mi leh sa panga te chu suspend an nih thu thuneitute chuan an puang. Heng police-te hi Digorkhal check-post-a duty-te niin, Assam-Meghalaya inter-state ramria Gumrah Police Investigation Centre-a telte niin an sawi.

Assam police pangate ban an nih thu hi Cachar SP Numal Mahatta chuan sawiin, an district chhunga kuhva rah tawlh ṭhinte man duh loin an kaltlangtir ṭhin niin a sawi. Mahatta chuan,"Tawlh ruk tur kuhva rah phur truck pahnih chu Shibnagar gate paltlangtir an ni a, heng police-te hian an kaltlangtir a ni. Truck hi smuggler-te ta ngei a ni a, gate an paltlang hnu hian Gumrah police station-a officer-in-charge chuan um zuiin Meghalaya ramriah a va um pha a ni," a ti.

Kuhva rah phur truck khalhtu pahnihte hi police chuan an man tawh a, smuggler-te pawh hi man an ni tawh a ni. Man an nih hnua tlan chhuah a tumna lamah smuggler pakhat hi police-te nen inkapin, hliam tenau a tuar zui bawk. "Thu zawh fiah an nih hnuah truck pahnihte hian police-te puihnain check gate hi an paltlang ngei tih kan hre tawh a, heng police pangate pawh hi man nghal niin, Silchar police station-ah dah nghal an ni," tiin Mahatta chuan a sawi.