Nagaland Chief Secretary office khar
Nagaland chief secretary office leh Directorate General of Under Developed Areas (DUDA) office-a thawktu zingah Covid-19 kai hmuh an awm avangin nimin aṭang khan darkar 48 chhugin khar a ni.
Additional Deputy Commissioner, Kohima chuan heng officer kharna tur thupek hi tichhuakin, office pawh hi damdawi hmanga kah thianghlim nghal a nih tur thu a sawi.
Pathianni khan Nagaland-ah hri kai hmuh thar mi 54 awmin, an zinga 26 chu Kohima mi an ni a, Dimapur mi 21 bakah Zunheboto mi pasarih an tel bawk. Hri kai thar zingah hian armed forces mi leh sa 13 an tel bawk a ni.
Hri kai hmuh tawh hi mi 3,394 an tling tawh a, an zingah 1,321 chu dam tawhin mi 2,059 enkawl mek an la ni. Hripui vang hian mi pasarih an thi tawh bawk. Health department chuan an state-a Covid-19 thihpui zinga 86% chu natna benvawn nei sa an ni tih a sawi. Dimapur district bikah hri kai hi 1,739 an awm a, Kohima-ah 911 an awm a ni.