Tualchhung ṭawng inzirtir nan Roman hawrawp hman tum

Arunachal Pradesh chief minister, Pema Khandu chuan state sorkarin hnam behchhana pawl dinte nen thawkhoa tualchhung ṭawng inzirtirna atana hawrawp thar duan emaw, Roman hawrawp hman dan emaw ngaihtuah a nih thu a sawi.

Pema Khandu hian Thegtse Sangye Choi Long Monastery-a Shar Amartala Torgya Festival hman mekah thu sawiin, sorkar chuan an state chhunga hnam hrang hrangte ziarang leh ṭawngte a vaia vawnhim a nih theihna tur chu a ngaihpawimawh thu a sawi a ni. Khandu chuan,"Khamptis leh Monpas te hian anmahni hawrawp neiin sikulah an inzirtir thei a, an vannei tak zet a ni. Tunah hian hnam behchhan pawl hrang hrangte nen thawkhoin, anmahni ṭawng puala hawrawp neih tumin kan bei mek a ni. A ṭul chuan Roman hawrawp pawh hman a ni ang, hei hian ṭhangtharte zingah ṭawng hmangin kan hnam bul ṭhut min hriattir thei dawn a ni," a ti.

Khandu chuan Shar Amartala Torgya Festival vawi thumna an hmang thei leh, West Kameng, Tawang leh Bhutan aṭanga mipui tam tak an lo kal chu lawmawm a tih thu a sawi a, monastery din, enkawl leh tihhmasawnna kawnga MLA-te hmalakna chu fakawm a tih thu a sawi bawk. "Keini Mon mipuite chuan Buddhism hi kum tam tak kan lo zui tawh a, kan hnam ziarang pakhat a ni a, kan hnam nihna vawnhim leh a vul zelna atana thawh hi leilung fa kan nihna anga kan mawhphurna ṭheuh a ni," tiin a sawi bawk.