Tripura : Inchiuna hriau damdawi chawhna tel loa leitir khap

Tripura sorkar chuan an state chhunga damdawi zuarte chu paih mai theih inchiuna hriau, a bik takin insulin dose lakna ang chi chu damdawi chawhna tel loa leitir lo turin a hriattir.

Sorkar thupek hi inchiuna hriau hralh chhuah thununa atana ruahman a ni a, drug addcit-te'n an hman nasat avanga thunun ngai niin Tripura health department chuan an sawi. "Heng hriaute hi dawrah lei mai theihin a awm a ni. Damdawi dang ang lo takin lei dawn hian phalna bik ngai a ni bawk si lo, hei vang hian drug addict-te'n duh duh hunah an lei thei a ni. Anmahni hriat an nih loh nan an bul hnai damdawi dawrah pawh lei loin hmun dang daihah te an lei a, damdawi zuarte pawh an hriat zawng ni lote chu inchuina hriau leitir lo tura hriattir niin, damdawi chawhna an neih erawh chuan leitir phal tur an ni tih kan hrilh," tiin an thuchhuahah an tarlang. Sorkar hmalakna hi Tripura-a damdawi zuar pawl lian ber, Tripura Chemist and Druggist Association te chuan an thlawp thu an tarlang bawk.

Agartala khawpuia damdawi zuar pakhat, Abhijit Saha chuan,"Kar tam tak min daih ṭhin stock kan neih te kha kar khat chhung lekin a zo ta vek a, hemi hnu hian thil awmzia kan hre ta chauh a ni. Damlo enkawlna atan ni loin, ṭhalaite'n inchiu nan an lei nasa. He dan hian inchiuna hriau zawng zawng huam se tih hi ka duh. Hriau te hmang loa hriau lian an hman chuan a nghawng chu a chhe leh zual ngei ang," tiin a sawi. State sorkar hian he hmalakna hi remchang hmasa berah thlirho leh tur niin a tarlang.