Meghalaya : Khasi mandarin theihai metric ton 20 thawn chhuak

Meghalaya agriculture minister, Ampareen Lyngdoh chuan Meghalaya-in Dubai-a Khasi mandarin theihai metric ton 20 an thawn thu puangin, ram danga mandarin theihai metric ton 1.5 aṭanga metric ton 2 an thawn tur thu a sawi chu tunah metric ton 20 a tlin tak thu a tarlang.

Lyngdoh chuan,"He hmalakna hian kan loneitute thinlungah ngaihṭhatna a tuh ngei ka beisei. Kan ṭhang dun ang a, kan hlawk dun ang tih hi loneitute hian hria se ka duh," tiin, an state sum leh pai dinhmun chu loneitute kutah a innghah thu a sawi. "Tuna hmabak kan neih ko tak chu loneitute pawl zawng zawng puia, mihring siam chawp thil tel loa lo neih dan phung kalpui leh hi a ni. Hemi atan hian Organic Mission hi kan ngaihven a ṭul. Lo neihnah hian kan innghah ngam leh a ngai a, a ṭul dan ang zela inzirtir, inthen fai, leh sum faia ṭanpui pawh kan tum dawn a ni," tiin a sawi bawk.

Meghalaya agriculture secretary, Isawanda Laloo chuan thei leh thlai tana boruak danglam tak an neih chu an state-in thei chi hrang hrang thar tura theihna a neihna pho langtu a nih thu sawiin, chu an theihna chu hman ṭangkai an tum thu a sawi bawk. Khasi mandarin theihai thawn chhuahna hunah hian Apeda leh Lulu group aiawhte chuan an telpui a ni. Meghalaya sorkar chuan nakin zelah tuna thawn chhuah aia tam hi thawn chhuah theih an inbeisei thu sawiin, ram dang pawhin Khasi mandarin an ngaihven an beisei thu a tarlang.