Manipur : Nupi Lan anniversary hmang

Manipur history-a hmeichhiate indona tia an sawi, kum 1904 leh 1939-a thleng, Nupi Lan thlen cham pualin Ningols United Progressive Initiative (NUPI) chuan New Delhi-a Delhi University polo ground-ah Manipur hmeichhiate tan marathon an buatsaih.

NUPI thupuangtu, Reemi Khaidem chuan,"Manipur chanchina hmeichhiate hnathawh chawimawi a, khawvel hriata tarlan hi kan tum ber a ni. An hnam humhim tur leh, awptute rorelna dik lo tak avanga an beih letna avangin Manipur hmeichhiate hian chawimawi hi an phu em em a ni. Tuna Manipur-a thil thleng mek avang hian he thil hian ngaihven pawh a hlawh leh zual a ni," tiin an thuchhuahah a tarlang.

Marathon-ah hian Delhi-a awm eng hnam hmeichhia pawh a duh apiang tan tel theih a ni a, mipa tel an phal lo thung. He hun hmanpuitu, Olympic-a India tana silver medal lo dawng tawhtu Mirabai Chanu chuan Manipur nute'n an hnam thuam, phanek ngeia inthuama phur taka kilometre tam tak an tlan hmuh chu a lo inbeisei loh thu a sawi. "Vawiin hi ni danglam tak a ni a, Nupi Lan hi Manipur history-a hmeichhiate'n anmahni awptute laka tal chhuak tura an beihna chhinchhiahna a ni. Manipur tan an bei a, vawiinah hian khang Manipur nuhote chawimawi nan hun kan hmang ve leh thung a ni", tiin a sawi.

Nupi Lan puala Marathon buatsaihah hian kum 17 mi, Khurien Dhangshwa chuan 'run for unity' km 5-ah hnehna changin, kum 56 mi, Nonibala Devi chu tlan tluan thei upa ber a ni a, Sanayaima Gurumayum, kum 84 mi chu marathon-a tel zinga upa ber a ni bawk.