Assam : NCHAC inthlan January 8-ah nei dawn

Assam state election commission chuan North Cachar Hills Autonomous Council (NCHAC) inthlan chu nakkum January 8-ah neih a nih tur thu a puang.

State election commissioner, Alok Kumar chuan press mite hmaah inthlan neih hun tur hi puangin,"Inthlan hi ballot paper hmanga neih tur a ni. Hei hi tun dinhmunah Electronic Voting Machine (EVM) hman tur a awm rih loh vang a ni," tiin a sawi.

NCHAC-ah hian constituency 28 awmin, nomination file turte tana ni hnuhnung ber atan December 21 ruat a ni. Inhnuhdawhna hun hnuhnung atan December 22 ruat a ni a, hemi ni vek hian nomination pawmte tarlan a ni bawk dawn niin Alok Kumar chuan a sawi. Inthlan niah hian vote hi zing dar 8 aṭanga tlai dar 4 thleng thlak theih a ni dawn a, inthlan result hi January 12-ah chhiar a ni ang.

Alok Kumar chuan NCHAC hnuaia constituency 28-ah hian voter 1,41,124 an awm a, polling booth 280 siam tum niin, constituency zawng zawngah hian a ruala inthlan neih tur a ni tiin a sawi. Vote hi November 14-a electoral roll update thar ber mila thlak theih tura ruahman a ni a, inthlan chhunga dan leh hrai kenkawh chu state police-te kuta dah a ni.