Manipur-ah Covid-19 vangin mi pathum thih belh leh

Manipur-ah Pathianni khan Covid-19 vangin mi pathum an thih belh leh a, hripui vanga thi hi mi 16 an tling tawh a ni. 

Additional health director Dr K Sasheekumar Mangang chuan hripui vanga thi, mi pathumte hi mipa vek, kum 44,  73 leh 94 mi an nih thu leh, an zinga pakhat chu  BSF sipai a nih thu a sawi. 

Pathianni khan hri kai hmuh thar mi 179 an awm leh a, an zingah mi 111 chu security force mi leh sa an ni. State chhunga hri kai hmuh tawh hi mi 4,569 an tling tawh a ni. Hri kai zing 2,632 chu enkawl dam ni tawhin recovery rate hi 57.60% a ni a, enkawl mek mi 1,921 an la awm.