Sikkim : Khualzin tangkhang 900 chuang chhanchhuak

Indian army-te chuan khawvawt leh vur tla avanga Sikkim khawchhak lam hmun hrang hranga khualzin tangkhang 900 an chhanchhuah thu an puang. Khualzin tangkhang an chhanchhuah zingah hian pitar/putar, hmeichhia leh naupang te pawh an tel a ni.

Khualzin tangkhangte hi Sherathang, Thegu leh Tsangu vela tang, vur tla nasa avanga Gangtok-a let thei tawh lote an ni hlawm a, vur tla karah hian motor 261 leh bike 38 zet an tang a ni. Gangtok pawhtu kawng pawimawh tak, Tsomgo lake leh Nathula kalna, JN Road chu vur tla avang hian a ping vek a, khualzin tangkhang ṭhenkhat hi Changu leh 17th mile inkarah te an tang hlawm a ni.

Chhanchhuah hna hi Indian army Trishakti corps te chuan thawkin, Nilaini khan chhanchhuah hna hi zanlai thleng an thawk a ni. Indian army bakah hian Sikkim police leh General Reserve Engineer Force (GREF) te chuan chhanchhuah hna hi an thawk bawk. Khualzin tangkhang an chhanchhuahte hi thawmhnaw lum bakah eitur lum leh damdawi te pein hmun lum leh him lamah an sawn tawh hlawm a ni. Sipaite hian an awmna barrack tiruakin heng khualzin tangkhang an chhan ṭhenkhatte hi an riahtir bawk.