Nagaland : Kuminah ruihhlo Rs. vbc 199 hu man tawh

Nagaland police-te chuan kumin chhunga an state-a ruihhlo tawlh ruk tur an man tawh zawng zawng chu Rs. vbc 199 man hu a tling tawh niin an sawi. Nagaland Director General of Police (DGP), Rupin Sharma chuan ruihhlo mante hi operation hrang hrang an neiha an mante a nih thu a tarlang.

DGP Sharma hian press mite kawmin Nagaland, Manipur, Assam, Arunachal Pradesh, West Bengal, Bihar, Punjab leh Haryana state-ah te ruihhlo tawlh rukna kawnga inthlunzawmna lian tak awm chu an chhui chhuah thu leh, November 13-a Sechu Zubza bul, Manipur-a smuggler pakhat leh a thawhpuite an man thu a sawi. Heta an mi mante hian sahbawn bawm 90-ah ruihhlo an dah thu sawiin, Manipur aṭanga Dimapur pan an ni, a ti. Sharma chuan an mi mante hian kum khat chhung chu vawi za tam ruihhlo an phur kual thu leh, ruihhlo kg. 60 chuang tawlh tawh anga an insawi thu tarlangin, thu zawh fiahna aṭanga an chhui zelnaah mi 12 an man belh tawh niin a sawi bawk.

Nagaland hian kumin chhungin ruihhlo kaihhnawihah thubuai 318 an ziak lut tawh a, mi 456 man tawhin, damdawi, marijuana, opium, heroin, Yaba tablet leh dan phal loh damdawi ang chite chu an man tam ber niin DGP chuan a sawi. Ruihhlo kaihhnawih thubuaiah hian state sorkar hnuaia hnathawk mi 49 te chu chhui zui mek an ni bawk a, an zingah hian police mi leh sa pawh an awm a ni.