Meghalaya-ah ILP hman a nih dawn em hriat a la nih loh thu CM-in sawi

Meghalaya chief minister Conrad K Sangma chuan an state-a Inner Line Permit (ILP) hman a nih leh nih loh chungchangah sorkar laipui hnen aṭanga chhanna mumal tak an la dawn loh thu a sawi.

CM Sangma chuan Meghalaya-a ILP hmanna tur chu kalpui thuai a nih theih nan sorkar laipui chu an nawr reng thu sawiin,"Mipui leh state sorkarin resolution a siam angin ILP hman duhna hi a nasa hle a, kan zavaia kan duh ang ngeiin India sorkar hnenah ngenna pawh kan siam tawh a ni. Sorkar laipui erawh chuan hman phalna thu a la sawi chiang lo a, chhanna mumal zawk kan la nghak reng a ni," a ti. CM chuan Meghalaya Residents Safety & Security Act (MRSSA) chu ILP aiah pawh hman theih a nih tho thu sawi bawkin, Assembly-in a pass tawh leh, President hnena an thlen hnua sorkar laipuiin India constitution nen inkalh a awm avanga ennawn tura a ngen thu a tarlang bawk.

Hmarchhak state zingah ILP hi Manipur, Nagaland, Mizoram leh Arunachal Pradesh te chuan an hmang mek a, Meghalaya pawh hian Citizenshiop Amendment Act (CAA) pawm a nih hnuah ILP hman ve hi a dil a ni.