Manipur : COTU-in buaina avang thite vui nan darkar 12 shutdown puang

Committee on Tribal Unity (CoTU) chuan Manipur tualchhug buaina avanga nunna chante vuina hun hman a nih chhungin Manipur-a Kangpokpi district chhungah darkar 12 shutdown an puang.

Kangpokpi district chhunga shutdown hian nimin zing dar 5 aṭanga tlai dar 5 thleng awhin CoTU chuan sorkarin an mi leh sa thite ruang a pe let chu an lawm thu an sawi."Heng kan unau, Kuki-Zo nunna chante ruang hi vui liamna hun ropui leh zahna sang ber kan hlan a ni," an ti. Ruangte hi a ruala phum an ni a, vuina hun hman a nih chhung hian Kuki-Zo chhungkua zawng zawngte chuan flag dum zar vek turin CuTO chuan a ngen bawk. Vuina hun hi chawhma dar 11-ah hman a ni. Tualchhung buaina chhuaka Kuki-Zo thite ruang hi Ningani khan an chhungte hnenah hlan an ni a, Kuki-Zo ruang 60 chu Manipur hmun hrang hranga ruang dahna hmun aṭangin lak chhuah an ni.

Hetih lai hian Meitei pawl pakhat, Thawai Mirel chuan mitthite ruang an chhungte hnena pek let chu thil tihdan phung ni lo tiin an sawisel thung. Thawai Mirel hmeichhia co-convener, Paonam Sanahanbi chuan,"Sorkar hian Meitei bo mi 37 te hi an chhungte hnenah a pe let ve ang em? Kan Meitei unau bote hi sorkar hian an chhungte hnenah min pe let ve lo a nih chuan hei aia nasa hian kan lungawi lohna kan lantir ang," tiin a sawi.

Myanmar aṭanga Manipur-a lut mi 4,100 tling tawh

Myanmar buaina avanga Manipur-a raltlan an pung zel a, Manipur ramri district; Kamjong, Ukhrul leh Tengnoupal-a relief camp-a awm hi mi 4,100 an tling tawh niin thuneitute chuan an tarlang.

Raltlante hi hmeichhia leh naupang an ni deuh ber a, Myanmar-a Manipur ramri, Sangaing region-a chengte an ni hlawm. Myanmar sipai sorkar leh helpawlte chu Border pillar 92 leh 102, Kamjong district chhunga Phaikoh leh Skipe khaw bula an indo avangin heng mite hi Manipur-ah hian an raltlan a ni. Raltlan hi November 2023 aṭang khan lut ṭanin, Namlee, Wanglee, Kaka, Kheronram relief camp-ah te an khawsa deuh ber a ni.

Manipur chief minister, N Biren Singh chuan Myanmar mi Manipur-a raltlana awm mekte chu an rama indona avanga tlanchhia an nih avangin a lainat thu leh, sorkar chuan a theih ang anga an mihringpui an nih avanga an tuamhlawm thu sawiin, ram leilung fate tan an hlauhawm loh nan erawh raltlante chu an biometric laksak vek an nih thu a tarlang.