Jorhat military camp bulah bomb puak

Assam-a Jorhat-a Lichubari Military Camp-ah Ningani zan khan bomb puakin, thi leh hliam erawh an awm lo niin an sawi. Hei hi ni 22 chhunga Assam-a bomb tihpuah a nih ṭum thumna a ni.

Bomb puak avang hian Lichubari Military Camp gate chu khar rih a ni a, thuneitute chuan bomb rawn vawmtute hi bike-a inphurin camp chhungah hian an vawm lut a, hmanhmawh takin an tlanchhe leh niin an sawi. November 22 khan Tinsukia district, Dirak-a army camp gate pawnah bomb tihpuah a lo ni tawh a, December 9 khan Sivasagr district, Joysagar-a 149 CRPF camp-ah bomb tihpuah a ni tawh bawk a ni.

Bomb puakte hi a vaiin United Liberation Front of Asom-Independent (UNLF-I) chuan an tih a nih thu an sawi a, Ningani zana Jorhat-a an bomb tihpuah chu sipai emaw, mipui emaw tina tura tipuak an nih loh thu leh thuneihna fawng chelhtute vauna mai a nih thu an tarlang. UNLF-I hian Assam director General of Police, GP Singh vauna tichhuak bawkin, Assam-a politics chungchanga an buai mekna chu dan leh hrai kaihhnawih a ni lo a, lo inrawlh lo turin an hrilh.