Meghalaya Games 2024 atan sorkarin Rs. vbc 23 ruahman

Meghalaya sports minister, Shakliar Warjri chuan nakkum January 15 aṭanga 20 thlenga Meghalaya Games 2024 hman tur atan state sorkar chuan Rs. vbc 23 a ruahman thu a sawi. Meghalaya Games 2024 hi West Garo Hills-a Tura-in an thleng dawn a ni.

Sports Minister chuan Meghalaya Games chu state chhunga sport chawikan nan leh ṭhangthar zawkte theihna phochhuahna hun atana hman a nih tur thu a sawi. "He intihsiakna hian ṭhangtharte zinga talent leh theihna nei ṭha tak tak te rawn phochhuak se, nakin zelah ram pum huap leh khawvel huap pawha intihsiaknaah Meghalaya aiawhtute rawn ni chhunzawm zel bawk se tih hi ka duhthusam a ni," tiin Warjri chuan a sawi. Minister hian infiammite tana awmna tur ṭha buatsaih, an kal velna ṭha zawk pek leh an mamawh thil chi hrang hrang chhawpchhuahsak theih chu state sorkarin a ngaih pawimawh thu a sawi a, Meghalaya Games 2024 atan hian engmah sak thar awm rih lo mah se, hmunhma an neih sa te thuam ṭhat vek a nih tur thu a sawi bawk.

Meghalaya Games 2024 atan hian Meghalaya State Olympic Association’s (MSOA) leh Games Technical Conduct Committee (GTCC) te chuan November 20 khan meeting an lo nei tawh a, tun ṭumah hian sports discipline chi hrang hrang 22 aṭangin intihsiakna buatsaih tum a ni. Meghalaya Games 2024 hi a ṭum ngana tur a ni.