Assam tuilianin ziaawm lam la pan lo
Ruahsur nasa avanga Assam-a tuilian thleng chuan ziaawm lam a la pan lo a, tuilian vang hian mi pakhatin nunna a chan tawh. Mi nuai thum dawnin tuilian hi an tuar a ni.
Assam State Disaster Management Authority (ASDMA) chuan tuilian vang hian Goalpara district-ah mi pakhat a thi tih sawiin, Dhemaji, Lakhimpur, Nagaon, Hojai, Darrang, Barpeta, Nalbari, Goalpara, West Karbi Anglong, Dibrugarh leh Tinsukia district-a cheng mi nuai 2.72 velin tuilian hi an tuar tih a tarlang.
Tuilian hian thingtlang khaw 321 a chim tawh a, district pangaah tuilian tuarte awmna tur relief camp 57 siam a ni bawk. Relief camp-a awm, mi 16,720 te tan buhfai quintal 172.53, tel liter 804.42 leh ei tur dangte sem a ni tawh bawk.
Chief minister Sarbanada Sonowal chuan an state-ah hri lengin zual lam a pan chhoh mek avangin, relief camp-a awmte pawh social distancing te zawm
ṭha turin a ti. Kut sil uar tur leh, face mask-te hmang ṭha turin a chah. Tuilian tuarte hnena chhawmdawlna sem kawngah dik taka thil ti turin district thuneitute a chah bawk a, tuilian avanga nunna chan chhungte hnenah sorkarin zangnadawmna a pek turte chu darkar 48 chhunga pe nghal zel turin a ti bawk a ni.