Manipur : Relief camp tan Krismas hmanna buatsaih turin state sorkar hriattir

Supreme Court chuan Manipur tualchhung buaina tuartu, relief camp-a awmte'n Krismas an hman theih nan ruahmanna siamsak turin Manipur sorkar a hriattir. Court hian Manipur-a sakhaw hmunte chu Krismas hmang duhte'n an pun khawm theih nana buatsaih a ṭul thu a sawi bawk.

Chief justice of India, DY Chandrachud chuan he thu hi ngaihtuahin, Manipur aiawh hian Solicitor general, Tushar Mehta a inlan a ni. Mehta chuan Diwali-ah pawh court inrawlhna tel loin state sorkarin him taka lawmna hun a buatsaih theih thu sawiin, "Sakhaw pakhat kut, hnam pakhatin an hman a hlawhtlin theih nana court order siam chu hnam ṭhenkhat tan a thik theih a, tin, thla tam tak chhung Manipur dinhmun thlirin boruak ṭha lo a thlen theih a hlauhawm," tiin a sawi. Additional Solicitor general Aishwarya Bhati pawhin court thuchhuak chuan sakhua zawng zawng huam ṭhin se a duh thu a sawi ve bawk.

Hetih lai hian state inrawlh tura nawr tura thu thlentu, senior advocate, Huzefa Ahmadi chuan inthik tawnna boruak siam tura thu thlen a nih loh thu leh, Meitei Kristian Churches Council aiawha ding a nih angin,"Khua leh tuite'n duh leh beisei an zawn ṭhin zingah thil te tham deuh pawh a awm thei," tiin, Krismas lo thleng mai tur chu mipuite'n hlim taka lawmna hun an hman theih nan leh, him taka an pun khawm theih nan state sorkarin ruahmanna a siam a ṭul thu court hi a hrilh.

Supreme Court hian Manipur chhunga sakhaw hmun tihchhiat leh khawih chhiat ni ve lote dinhmun kimchang zir chianga, state-in report an pekna tur hian Justice Gita Mittal committee a lo din tawh a, he committee hian sakhaw hmun tihchhiatte siam ṭha leh tur hian rawtna an neihte an buatsaih dawn bawk a ni.

Churachandpur-ah ruang 87-te a rualin phum dawn

Manipur tualchhung buaina avanga Kuki-Zo mi thi, la phum lohte chu Churachandpur district-ah December 20 hian a ruala phum an ni dawn. Ruang phumna tur hmun hi Mata-a Tribal Martyrs Park-ah buatsaih a ni.

Indigenous Tribal Leaders’ Forum (ITLF) thupuangtu, Ginza Vualzong chuan Imphal-a ruang dahna hmun aṭanga kar hmasa Ningania Churachandpur-a an phurh thlen, mi 41 te ruang nen, a vaiin December 20 hian ruang 87 a ruala phum an nih tur thu a sawi. Vualzong hian Churachandpur district hospital-a ruang dahnaah ruang 46 a awm sa thu a tarlang bawk. "Tunah hian ruang 11 chu an awmna chin hriat a ni lo. Heng ruang 11 zingah hian ruang hal ral tawh leh, an awmna chin hriat loh, bo leh thi nia report kan dawn si te an tel a ni," a ti.

Heti hian thla hmasaa Supreme Court-in thuchhuah a siam hnuah Manipur tualchhung buaina avanga nunna chante ruang an chhungte hnena phurh hna hi thawh niin, ruang 64 an phur chhuak tawh a ni. Ruangte hi Churachandpur, Kangpokpi leh Imphal-ah te thlen an ni deuh ber a ni.