Bangladesh cement zuar lianin Tripura nena thawhho an duh

Bangladesh-a leiverh lar tak, Bangabandhu tunnel sakna pawha hna pawimawh tak lo thawk tawh leh Bangladesh-a cement company lian ber pawl, Premier cement leh Tripura-a Agartala Municipal Corporation te chu inkawmin, Agartala-a hmasawnna hna thawh kawnga thawhho an duh thu an sawi.

Premier cement palaite hian kar hmasa Ningani khan Agartala tlawhin, Public Works Department leh Urban Development Department senior official te bakah Agartala Municipal Corporation Mayor, Dipak Majumder te an kawm a ni. Cement company aṭanga palai lo kal zingah hian head of export sales, Dr Shalal Uddin, Chief Financial Officer, Salem Reza FCA leh company secretary, Shafiqur Rahman te an tel.

Mayor Dipak Majumder chuan,"Bangladesh hi ram ngainatawm tak a ni a, kawng hrang hrangah kan inmamawh tawnna pawh a tam hle. Intlawhpawhna chungchangah pawh Tripura-in Bangladesh a mamawhna hi a sang zel a, South Tripura-a Sabroom chunga Maitri Setu leh international railway link te sak zawh a nih hunah phei chuan kan mamawhna hi a sang leh zual dawn a ni. He inpawhnaah hian Bangladesh aṭanga Tripura tana tha thawh duh an awm a nih chuan kan lawm hle ang," tiin a sawi. Hei bakah hian Dr. Shalal Uddin chuan,"Tripura-a hmasawnna hna thawh nan kan cement-te hi sorkarin a hmang a nih chuan, hmun dang aia man tlawm zawka pek kan tum a ni. Hei hian hnathawhnaa sum sen tam takin a chhawk thei dawn a ni," a ti.