Arunachal-ah MLA hlui thah a ni

Arunachal Pradesh-a Khonsa West Assembly aṭanga MLA ni ṭhin, Yumsen Matey chu Tirap district-a Raho khuaa a awm laiin, mi tu tih hriat loh pahnihin an that. Matey hian Raho khua hi mimal thila tlawhin, thah a nih lai hian a bulah worker pathum an awm.

Thudawn danin Matey thattu zinga pakhat hian Raho khua a tlawh lai hian worker-te lak aṭang hian a hruai hrang a, a bul hnaia ramhnuai chin deuhah hruai lutin minute 30 hnu velah silai puak ri hriat a ni. Itanagar Capital region SP, Rohit Rajbir Singh chuan Lazu police station-ah FIR theh luh a nih thu a tarlang. Matey thattu hi Myamar lamah a tlanchhia nia hriat a nih thu police-te chuan an sawi bawk.

Matey hi kum 2009 khan Indian National Congress ticket-in Khonsa West Assembly constituency aṭanga thlan tlin a ni a, department of women and social welfare-ah parliamentary secretary a ni ṭhin a, social justice & tribal afairs, department of Tirap, Changlang and Longding-ah te parliamentary secretary a ni ṭhin bawk. Matey hian nakkum assembly inthlan atana din leh a tum thu pawh a lo sawi tawh a ni.

Arunachal Pradesh chief minister, Pema Khandu chuan Yumsen Matey thah a ni chu pawi a tih thu sawiin,"Tualthahna rapthlak tak thleng hi ka dem a, a tuartu Matey leh a chhungte ka tawrhpui tak zet a ni. He tualthahna hi rang taka chhui a, pawikhawihtute hrem an nih thuai theih nana hma la turin Arunachal Pradesh police te ka ngen tawh bawk a ni," tiin X-ah a tarlang.