Meghalaya police-ten silencer siam danglam 181 an tichhia

Meghalaya police-te chuan kumin August thla aṭang khan an state-a two wheeler leh four wheeler silencer siam danglamte an vài a, kar liam ta thleng khan 181 manin, a neitute pawisa an chawitir aṭangin Rs 12,46,500 an hmu chhuak tawh.

Shillong traffic police-te kumtir aṭang khan silencer siam danglam lo turin hriattirna pawh an lo siam tawh a, 181 an mante hi Shillong-a Police Reserve compound-ah an tichhia a ni. He hun hi Superintendent of Police (SP) East Khasi Hills District, SP city Vivek Syiem, SP (traffic) Kamakhya Prasad, Deputy SP (Traffic) Joel Marngar leh official dangten an hmanpui.

East Khasi Hills SP, Sylvester Nongtnger chuan, silencer siam danglam hi 320 an hmu chhuak a, a tirah mansak nghal mai loin a neitute chu thlak tura hriattir hmasak an ni phawt tih a sawi. Mahse thlak duh loa hmang luite chu a hnuah man sakin, an tichhe ta tih a sawi. An man zinga a tam zawk hi two wheeler-a mi a ni tih a sawi bawk. "Silencer siam danglam hi danin a khap a, Shillong Traffic police-te chuan an vài chhunzawm zel dawn a ni," a ti. An mansakte chu Motor Vehicles Act hnuaiah Rs 5,000 zel chawitir an ni dawn tih a sawi bawk.

SP city Vivek Syiem chuan exhaust pipe siam danglam hian mipuite tan ri bengchheng tak a siam a, a bikin zan rei lamah phei chuan mi tam tak tan thil ninawm tak a ni, tih a sawi. Hetianga siam danglam an hriatte chu police hnena report zel turin mipuite a chah bawk a ni.

Shillong traffic police hian police station lam nena thawkhoin, zu rui chunga motor khalh leh license nei loa motor khalhte dapna tur checkpoint hrang hrang an siam bawk. Syiem chuan nu leh pate hnenah an fate chu driving license an neih hma chuan lirthei khalh tir lo turin a chah.