Manipur-in beverages corp. a din dawn

Manipur sorkar chuan kum 30 zet an state-a zu zawrh leh siam khapna dan an lo hman tawh a tihtawp hnuah, state chhunga bial thlan bika zu siam, zawrh leh in phalna a siamna hmuna kalpui dan siamtu tur, Manipur State Beverages Corporation Limited (MSBCL) a din dawn.

Kar liam ta kartawpa cabinet meeting-ah MSBCL dinna tur thutlukna hi siam a ni. Finance Minister enpuina hnuaiah, MSCBL hi board of directors kaihhruaina hnuaiah a awm dawn a, sector hrang hrang - finance, home affairs, health, education, rural development, leh municipal governance-ah secretary ruat a ni ang. Corporation hian zu siam dan leh zawrh chhuah dan te, zu lakluh leh thawnchhuahte a enfiah dawn a, quality control chu an ngai pawimawh dawn a, tualchhunga zu siam standard-te pawh an enfiah ṭhin ang.

Zu in thei chin leh zu dawra thawk leh enkawltu tur chungchangah pawh cabinet chuan kum 25 chin a bithliah bawk.

Educational institution, hospital, leh sakhaw hmun pawimawh aṭanga meter 100 huam chinah zu zawrh leh in khap tlat niin, Municipal rorelna hnuai tih lohah chuan, National Highway aṭanga meter 500 huam chhungah zu zawrh khap a ni bawk.