Tripura Tribal NGO-ten Hindu right-wing rally neih tum dodal

Tripura-a tribal NGO hrang hrangte chuan Hindu right-wing, Janajati Suraksha Mancha-in tribal hnam, Kristiana inpete ST status hlihsak phûta rally huaihawt an tum chu an dodal tih an sawi.

Tribal NGO intelkhawm, Joint Action Committee on Civil Societes (JACCS) chuan Janajati Suraksha Manch-in Kristian-te ni pawimawh, Krismas ni tak December 25-a rally huaihawt an tum p chu an state-a sakhaw tinte zalenna inpalzut saknaah an ngai tih an sawi bawk.

JACCS chuan thuchhuah siamin, "Tripura leilung fate zingah Kristian, Hindu leh sakhaw dang betute chu kum tam tak chhung inngeih takin an lo khawsa ho tawh a, sakhaw thil vanga intihbuaina a awm ngai lo. Tun ṭum hi kan state-a organisation-in sakhaw kaihhnawih thil vanga thil phût an neih an lantir ṭum khatna tur leh, sakhaw thil avanga leilung fate inṭhendarh tir tumna policy an kalpui ṭum khatna tur a ni," an ti. India chu democracy ram, sakhaw tinte zalen taka an awmna a ni a, mi tupawhin a sakhaw zui tur duhthlan turin dikna a nei a ni, an ti. Tribal miin sakhaw dang a zawm avangin tribal a nihna a bo chuang lo a, an sakhaw zawm avanga ST status pek an ni lo tih an sawi.

JACCS chuan pawl ṭhenkhatin tribal, Kristian sakhua zawmtuten state sorkar aṭangin hamṭhatna a thuahin an dawng nia an sawi chu thu dik lo a nih thu an sawi bawk.