CBI hotu Praveen Sood-a'n Manipur a tlawh

Central Bureau of Investigation (CBI) director Praveen Sood chuan Thawhṭanni tlai khan Imphal a thleng. CBI hian Manipur tualchhung buaina chhuak kaihhnawiha thubuai hrang hrangte a chhui dawn a ni.

Manipur DGP Rajiv Singh chuan Sood hi Bir Tikendrajit International Airport-ah a lo hmuak. Sood hian May thla khan CBI Director charge hi a la a ni.

Manipur-a hnam leh hnam inkara buaina chhuak kaihhnawiha thubuai parukte chu state sorkar hian CBI kutah a hlan. Heng bakah state police-te lo chhui tawh thubuai an lak chhawn leh nen, CBI hian Manipur tualchhung buaina chhuak kaihhnawh thubuai 27 an la tawh a ni. Sorkar laipui pawhin May 4-a Thoubal-a tribal hmeichhe pahnih, anmahni mantuten an thawmhnaw phelh sak veka saruaka kawng an zawhpui chungchang pawh CBI chhui tur hian a ti bawk.

September 27 khan Sood kaihhruai hian special CBI team chuan Manipur hi an lo tlawh tawh a, zirlai pahnih Hijam Luwangbi Linthoinganbi leh Philem Hemanjit thah an nih chungchang an chhuina atana tlawh an ni. December 9 khan CBI hian tualchhung buaina chhuak kal zelah, July thlaa Imphal-a Naga nu pakhat rawng taka thah a nih chungchangah mi pakuate lakah chargesheet a lo thehlut tawh bawk a ni.

Soodi hian Manipur sorkarin a din, Special Investigation Team (SIT) in thubuai paruk a chhui mek pawh hma an sawn dante a enpui nghal bawk.

Churanchandpur-ah buaina chhuak thar leh

Churanchandpur district-a Thingkangphi khuaah Thawhṭanni khan buaina a chhuak leh a, mi 30 velin hliam an tuar. He thil thleng vang hian District Magistrate chuan nakkum February 18 thleng atan mi panga leh a aia tam punkhawm khapna, CrPC 144 (2) a puang nghal bawk.

Buaina chhuahna hmunah hian Churachandpur district police leh Rapid Action Force-te kal nghalin, pungkhawmte hnawhdarh nan hian tear gas te an hmang a ni. District Magistrate hian buaina chhuak zel tur venna atana mi panga ai tam punkhawm khapna a siam bakah, silai, tiang, ngunhnam, chemical leh midang ti na thei hmanraw dang ken chhuah a khap bawk.