Rotterdam Film Festival-ah Naga film chhuah dawn

Netherlands-a International Film Festival of Rotterdam-a film chhuah tur thlan chhuah zingah Kohima-a film siam, 'Ade (On A Sunday)' a tel.

He short film hi film thehluh sang tel zinga aṭangin thlan a ni a, writer-director hi Theja Rio niin, Theja Rio, Dan Pusa, leh Nancy Nisa Beso-te produce a ni. 'Ade (On A Sunday)' hi kum 2002-a thil thleng, mipa naupang kum riat mi Ade leh a ṭhianpa, Abu-ten Sunday school an tlanbo chungchang, hun hlimawm tak an hman ruala an beisei lo thil an tawn chhoh dante a rawn tarlang a ni. Kohima bul, Pfuchama khuaah kumin January thla khan an chang an ni.

Kum 2021 khan Theja Rioa short film siam tho, 'Angh' chu Clermont Ferrand International Film Festival-ah premiere a lo ni tawh bawk a, hemi hnu hian ram hrang hrangah film festival neihna hmun 50 chuangah tih chhuah zui a ni bawk. Heng zingah hian film festival zingah ngaihven hlawh tak, Palm Springs leh Melbourne International Film Festival-te pawh a tel.

International Festival of Rotterdam hi movie festival ngaihhlut tak a ni a, filmmaker lar, 'Parasite' aṭanga hriat hlawh Bong Joon Ho bakah, 'Inception', 'Oppenheimer' leh film dang tam tak lo siam tawh, Christopher Nolan-te rawn lar chhuah chhohna pawh a ni bawk.