Manipur : Churachandpur-ah a rualin mitthi 87 vui
Manipur tualchhung buaina chhuaka thi, Kuki-Zo hnam mi 87-te chu nimin khan Churachandpur-a Peace Ground-ah a ruala vui an ni.
Manipur-a tribal leh Meitei-te inkara intihbuaina thlengah Churachandpur district hi buaina chhuah nasatna hmun a ni. Nimina mitthite vuina hun hman pawh hi venhimna khauh tak hnuaiah buatsaih a ni.
Pathianni zana tribal hnam pahnih inkara buaina a chhuah avangin Churachandpur district-ah hian CrPC Section 144 hman mek a la ni a, nakkum February 18 thleng hman a ni ang. He buaina hi Thingkangphai khuaa chhuak a ni a, tunah chuan boruak dai tawh mah se, boruak muanawm tak tichhe zawnga che chhuak palh an awm venthawn thilah, mi panga aia tam punkhawm khapna thupek hi hman chhunzawm zel a ni rih dawn tih District Magistrate chuan a sawi. Buaina chhuahna chhan hi mitthite phumna hmun hming phuah dan chungchangah tribal hnam hnihte duhdan a inan loh vang nia hriat a ni. Mahse Indigenous Tribal Leaders' Forum (ITLF) a inrawlh hnuah an buaina hi chinfel nia sawi a ni a, ITLF hian Aizawl, Nodia leh Churachandpur-a tribal hruaitu hrang hrangte an biakrawn hnuah, mitthi phumna hmun hi 'Kuki-Zo Martyrs' Cemetery' tih lungrual taka an pawm thu an sawi.
Nimina vui liam tak, mi 87-te ruang hi thla riat dawn chu ruang dahna hmunah dah an ni . Vui liam an nih theihna atana an ruangte pe chhuak tur hian tribal pawlte chuan thuneitu lam pawh an nawr nasa hle. Supreme Court a inrawlh hnuah ruangte hi an chhungte hnenah pek chhuak an ni chauh a, nimin khan a ruala vuina hun hi buatsaih a ni ta a ni.
Ruang 46 hi Churachandpur-ah mitthi dahna hmunah mi niin, a bak mi 41 ruang hi kar liam ta khan Imphal-a ruang dahna hmun aṭanga la chhuakin, Churachandpur-ah phurh thlen an ni.
Manipur-a Meitei hnamin Scheduled Tribe (status) pek an phutna dodalna lantir a, May 3-a tribal pawlin ‘Tribal Solidarity March’ an buatsaih avanga tualchhung buaina chhuaka thi hi mi 180 chuang an ni tawh a, himna zawnga hmun danga tlanchhia hi mi 60,000 chuang an tling tawh bawk a ni. In leh lo tam tak tihchhiat leh hal a nih bakah, sakhaw hmun pawimawh pawh tam tak tihchhiat a ni tel bawk. Thuneitu lamin tualchhung buaina hi a ziaawm chho tawh nia an sawi chungin, a khat tawkin buaina thar a la chhuak reng thung.