Manipur : Thoubal-ah district court thar hawng

Manipur chief minister N Biren Singh chuan Nilaini khan Thoubal court complex-ah court of district & sessions judge atan G+3 Annexe Building thar chu a hawng. Biren Singh chuan court building chu state chhunga dikna leh intluktlanna chhinchhiahna ni se a duh thu a sawi.

Court building thar hawnnaah hian Chief Minister hian an state-in Law university an mamawh thu sawiin, a kaihhruai sorkar chuan a ṭul anga hmalak pawh an tum thu a sawi. "Democracy lungthu pakhat chu judiciary a ni" tiin, Manipur High Court Chief Justice ruat thar, Siddarth Mridul chu a lo lawm thu a sawi bawk. Singh chuan sum leh pai lamah an state chu harsa deuh mah se dan lama harsatna an neih loh nan a theih ang anga sorkar chuan dan lam mamawh thilte a ngaihtuah ṭhin thu a sawi.

Manipur High Court chief justice, Siddarth Mridul pawhin thu sawiin,"Dan rorelna hmun siam tura pawimawh ber chu rorelna dik hmu tura kawng zau tak hawn a ni a, Manipur mipui zawng zawng tana rorelna dik ban phaka dah tur hian court hmunhma leh thawktute awmna siam te hi thil dang tam tak zinga pawimawh takte an ni ve a ni. Tunah hian lehkhapuan hman lohna court kalpui tumin hmalak mek a ni a, thu theh luh duh neite pawhin internet leh video conferencing hmangin state chhung hmun kilkhawr ber aṭang pawhin min rawn be pawp thei tawh dawn a ni," a ti.

District court thar hawnnaah hian Law & Legislative Affairs minister, Th Basanta Kumar Singh, Manipur High Court judge te - Justice AnBimol Singh, Justice A Guneshwar Sharma, Justice Golmei Gaiphulshillu Kabui leh Ld. Advocate general, Manipur, Lenin Singh Hijam te bakah mi pawimawh tak tak eng emaw zat an tel a ni.