Assam : Zirtirtute'n zirna chhunzawm turin phalna lak hmasak ngai

Assam sorkar chuan zirtirtu leh zirtir hna thawk lem lo, provincialised secondary school-a thawkte chu an service laia zirna chhunzawm tur leh, degree thar nei turin thuneitute hnen aṭanga phalna an lak hmasak zel a ngai tawh dawn tih a puang.

Secondary Education Director, Mamata Hojai chuan state chhung sikul hrang hranga inspector of school te hnenah hriattirna hi thawnin, Assam Civil Services (Conduct) Rules, 1965 chu a tarlang a, hei hi khauh taka zawm tur a nih thu a tarlang tel bawk. Hojai chuan zirtir hna thawk emaw, zirtir hna thawk kher lo emaw tan pawh, provincialised school-a thawk an nih chuan, zirna leh thiamna kawng zawh chhunzawm tura phalna an la hmasa lo a nih chuan service rules bawhchhiatna a nih thu a sawi. "Tun aṭang chuan provincialised secondary school-a thawk tu pawhin an thawh hun chhunga zirna chhunzawm emaw degree emaw neih belh tura tih an neih a, phalna an la hmasa a nih bawk si loh chuan department inkaihhruaina anga an chunga rang tak hmalak tur a ni. Dan bawhchhia an awm a nih chuan The Assam Services (Discipline & Appeal) Rules, 1964 hnuaia dan bawhchhiate hremna dan hmangin an chungah action lak tur a ni ang," a ti.

Provincialised school kan tihte hi sorkar sikul ni lo, mahse, sorkarin sikul thil neih zawng zawng chawpa a lak tawh ni si te an ni. Sorkar hian tihdan phung pangngaiah chuan hmun fal taka awm, hnam hnufual zawkte sikul kalna emaw, sorkar sikul awm lohna hmuna sikul ang te chauh hi sorkar sikul atan a la ṭhin a ni.