Meghalaya : Sorkar hnathawk mi 55,000-te DA tipung

Meghalaya sorkar chuan a hnuaia thawk mi 55,000 te Dearness Allowance (DA) chu tihpun a nih tur thu puangin, sorkar chuan a hnuaia thawkte a ngaihsak thu an sawi. State sorkar hian December thla hlawh chu ṭum dang aia hmaa pe chhuakin DA rate 36% chu 39%-ah tihpun a ni.

Chief minister Conrad K Sangma chuan hemi chungchang hi social media lamah puang zarin,"Sorkar hnathawk mi 55,000-te Krismas chibai ka buk a che u. December thla hlawh hi pek chhuah a ni tawh tih ka puang duh a, chumi rual chuan 3%-a DA tihpun pawh pawm a ni tawh tih hi ka sawi tel duh," tiin a tarlang. DA tihsan hian sorkar hnathawk tam tak tan kawngro a su hle tura beisei a ni a, khawsak man hautak leh thil man sang zel karah sum leh pai lama an dinhmun a siam ṭhat theih beisei a ni. Sorkarin DA tipung tura thutlukna a siam hian state hmasawnna atan mimal thawhhlawk leh ṭhahnemngai tak takte tana sorkarin puih a tiamna a tihhlawhtlinna kawng pakhat a ni bawk a ni.