Tripura GSDP ṭhan nan industry a ṭhan a ngai : NITI Aayog

India rama scientist lar leh NITI Aayog member, Dr. VK Saraswat chuan Tripura GSDP ṭhanna atan industry-te an ṭan nasat a ngaih thu sawiin, state intodelh ni tura an thil tum tihlawhtling tur chuan industry chu a ṭhan nasat a ngai a ti.

Saraswat hi Tripura-a industry neitute leh NITI Aayog aiawh palaite'n inkawmna hun an buatsaihah thu sawiin, NITI Aayog chu state leh sorkar laipui inkarah palai hna thawktu a nih tur thu a sawi a, state hmasawnna dal thei harsatna chi hrang hrang chingfel tura an inpuih tawn tur thu a sawi. "Ram leilung dinhmun avang leh boruak awmdan avangin industry zawng zawng a din theih loh a, din theih bik industry tlemte chauh a awm a ni, chumi kawng zawh chuan kan vaiin ke kan pen tlan a ngai a ni," tiin a tarlang. Saraswat chuan chief secretary leh chief minister te nen pawh meeting an neih tawh thu sawiin,"Hemi chungchang hi chief secretary leh chief minister Dr. Manik Saha te nen pawh kan sawiho tawh a, an ngaihdante pawh min hrilh tawh a ni. Chiang taka ka sawi duh chu state ṭhanna atan hian industry sector-ah nasa taka ṭhan a ngai a ni. Thil danga kan ṭhan mai bakah industry hi kan ngaihpawimawh zual a ṭul," a ti.

"Kan hriat tawh chinah industry ṭhenkhat, mau, rubber, Agar leh lakhuihthei te chauh neih a remchang niin a lang a, chungte chu a tam em em thung. Hengte hian sum tam tak thawk chhuak thei dawn mah se, dinhmun hriat loh thil thleng thei avangin hengte chauh hi chu a lungawithlak loh a ni. Vawiina kan sawihona hi a ngaihtuahtu tur department leh policy siam thei ministry-te nen la sawiho leh a ni anga, kan harsatnate hre chunga hmasawnna kawng kan hmuh ngei theih ka beisei," tiin a sawi bawk.