Tripura : JSM-in December 25-a an kawngzawh tum sawn

Hindu pawl pakhat, RSS-in an thlawp; Janjati Suraksh Manch chuan Kristiana inpe tribal-te Scheduled Tribe (ST) category aṭanga paih phuta December 25-a kawng zawh an tum chu chief minister Dr. Manik Saha ngenna anga a hun an sawn thu an puang.

JSM activist, Pritimay Debbarman chuan an pawlin kawngzawh an tum chu Krismas ni loah sawn tura a ngen thu sawiin, chief minister ngenna hi an zahsak thu a sawi a,"Chief Minister Dr. Manik Saha hian a koah constitution-in a pek mawhphurna sang tak a nei a, kan pawl hian hei hi ngaihnepsak mai kan duh lo a ni," tiin a sawi. Debbarman chuan an kawngzawh tumah chuan mi 30,000 chuang tel an tum niin a tarlang bawk.

JSM kawngzawh tum chungchangah hian Tripura-a eptu pawl lian ber, Tipra Motha chuan JSM-in kawng zawh an tum chu phalsak lo turin chief minister hnenah an lo ngen tawh a ni. Eptu pawl hruaitu, Animesh Debbarma chuan chief minister Manik Saha hnenah lehkha thawnin,CPI (M) state secretary Jitendra Chowdhry leh Tripura Pradesh Congress Committee (TPCC) president Asish Kumar Saha te pawhin a hran ve vein rally neih tum hi dang turin sorkar lam an lo ngen tawh bawk. Tripura-a BJP kaihhruai sorkara Indigenous Peoples Front of Tripura minister awmchhun, Shuklacharan Noatia pawhin Krismas ni taka Hindutva group-in kawng zawh an tum chu na takin a lo sawisel tawh bawk a ni.