Meghalaya sorkarin Covid hri leng chungchangah thu a chhuah

India ram puma Covid-19 chi thar kai an pun leh tak avangin Meghalaya sorkar chuan mipuite hnena ngenna thuchhuah siamin, hunpui lo thleng kara mipuite chu fimkhur tur leh Covid laka invenna an lo kalpui tawh ṭhinte a theih chin china hmang leh turin a hriattir.

State sorkarin invenna chungchang thuchhuah a siamah hian mask vuah te, kut silfai ṭhat leh midang nena inhnaih lutuka khawsak lohte chu tarlan a ni a, Covid chi thar leng atana invenna leh inkaihhruaina hran mumal taka siam ni lo mah se vaccine lak ṭhat pawimawhna pawh thuchhuah hmang hian tarlan a ni.

Meghalaya-a zin turte tan Meghalaya Tourism App-ah in-register tur a ni a, hemi kaltlang hian E-invite an dawng chauh dawn a ni. Hetiang ruahmanna hi Meghalaya sorkar hian September 1, 2021 aṭang khan a kalpui tawh a ni. Covid vaccine chungchangah hian Covid vaccine lar tak, Moderna leh Pfizer-BioNTech te chu United States chuan hman chhunzawm phal lohna a chhuah avangin Meghalaya sorkar pawh hian khawvel ram dangte vaccine hman mila ruahmanna thar a siam rin a ni.

Covid-19 chi thar, JN.1 hi covid hmasate angin a kai leh thihpui pung thur thur lo mah se, thuneitute chuan a darh zel tur ven an ngaipawimawh hle a, hemi dung zui hian Meghalaya sorkar pawh hian state mipuite leh an state tlawhtu turte tan thuchhuah hi a siam a ni.