Manipur inkahnaa thi zat mi pali tling, RPF-in mawhphurtu an nih thu puang

Manipur  oubal district-a hnam tlem zawkte awmna, Lilong Chingjao-a January 1 zana inkahna thlenga thi chu mi pali an tling tawh a, buaina chhuak awm rih lo mah se, boruak a la rit hle niin offi cial-te chuan an sawi.

January 1 zan khan Lilong Chingjaoah hian mi tu tih hriat loh, sipai thuam anga inthuamte chuan khaw mite hnen aṭanga pawisa laksak tumin buaina a chhuak chhunzawm a, heng mite hian khaw mite chu kapin, Lilong Chingjao khaw mite hian an khua aṭang hian an um chhuak nia hriat a ni. He inkahna avang hian mi pathum an thi a, nimin khan mi pakhat chu a hliam tuar loa thi ve lehin, thi zat hi mi pali an tling tawh a ni. Imphal damdawi inah hliam na tak tuar pahnih chu ICU-a enkawl mek an ni bawk.

Offi cial-te chuan Lilong Chingjaoah hian sipai dah luh belh a nih tawh thu sawiin,"Inkahna a thlen tuk  awhṭanniah khan boruak a sosang hman hle a, mahse, sakhaw hrang hrang hotute leh khawtlang hruaitute'n Lilong MLA Abdul Nasir leh chief minister, N. Biren Singh te nena inkawmna an neih hnua, pawikhawihtute mana hrem ngei tura CM-in thu a thlah avangin boruak a ziaawm ta deuh a ni," an ti. Sipai dah luh belh a nih bakah hian helai chhehvela police-te lirthei hmanga an patrol ṭhin tur thu an sawi bawk a ni.

Lilong-a inkahna thlengah hian nimin khan sorkarin a khap, Meitei helpawl, People’s Liberation Army political wing, Revolutionary People’s Front (RPF) te chuan mawhphurtu an nih thu an puang. RPF te hian thuchhuah siamin, inkahna a thlen chhan chu an pawlin helai chhehvela damdawi tawlh ru ṭhin, Md Hassan man tura beihpui an thlak lai Lilong Chingjao khaw mite'n an mite an lo dan vang niin an tarlang.

RPF-te hian an thuchhuahah chuan mipuite'n an hmanruate laksak an tum thu leh mipui hnawh darh nan van lam hawia silai an hmeh puah thu te, khua an chhuahsan dawnah mipui lam aṭanga kah an nih thu leh, kap let ve chauh an nih thu an sawi. RPF assistant secretary and publicity, Bangkok chuan,"RPF chuan nunna chan an awm avang leh hliam tuar an awm avangin pawi kan ti tak zet. RPF chuan thil thleng chungchang hi kan chhui chiang dawn a ni," tiin a sawi.

Lilong Chingjao khuaa inkahna avanga thi mi palite hi Jawaharlal Nehru Institute of Medical Sciences, Imphal-ah post-mortem tura dah an ni a, anni bakah hian mi 10-in hliam an tuar bawk niin an tarlang. Hliam tuarte hi damdawi in dangah enkawl tura dah mek an ni a, an zinga mi palite hian silaia kahna hliam an tuar a ni. Inkahna thleng chungchangah hian Manipur chief minister, N. Biren Singh chuan,"Pawikhawihtute hi policete chuan ngawrh takin an chhui zui mek a, man an ni vat dawn a ni. Dan anga an chunga hremna lek kawh a ni ngei bawk ang," tiin a sawi. 

Moreh-ah buaina dang chhuak 

Tengnoupal, Moreh-ah January 2 khan sipai leh helpawlte inbeihna thlengin, khaw mite chuan Chavangphai-ah civil mi pahnih chu silaia vau betin hruai luih an nih thu an sawi. He thil thleng avang hian helpawl leh sipaite hi inkap chhunzawmin, mi pasarihin hliam an tuar a ni. 

Civil mi pahnih helpawlin an hruai luihte hi Chavangphai-a mi, Lamminthang Lupho leh Canan veng-a mi, Jangkholen Lupho te an ni a, khaw mite chuan zing dar 6 velah Arambai Tenggol helpawl mi leh sa, sipai anga inthuamte'n an hruai niin an sawi. Khaw chhunga hmeiche ṭhenkhatte chuan chhan an tum laiin silai hmeh puah a ni a, hemi hnu hian sipaite nen inkap zawmin, sipai pasarihin hliam an tawrh phah a ni. Heng sipai hliamte hi Imphal-a RIMS-ah enkawl tura hruai an ni.

Imphal-ah curfew puang

Imphal valley-a district pangaah buaina a chhuah chhunzawm hlauhna avangin curfew puan a ni a, sumdawnna hmun tam tak khar niin, khawlaia chhuak lirthei pawh a tlem hle. Lilong Chingjao-a inkahna thleng avang hian  oubal, Imphal East, Imphal West, Kakching leh Bishnupur district-ah te chuan curfew puan a ni.