CoTU-in AFSPA hmang leh turin Union Home Minister ngen

Manipur, Kangpokpi district-a Committee on Tribal Unity (CoTU) chuan Union home minister, Amit Shah hnenah Moreh aṭanga Metei police, Meitei firfiak leh Valley-a innghat helpawl inpe tawhte la chhuak tura ngenin, valley district zawng zawnga Armed Forces Special Power Act (AFSPA) hmang leh turin an ngen bawk.

Sadar Hills-a CoTU-te leh Churachandpur-a Indigenous Tribal Leaders Forum (ITLF) te chuan nimin zing aṭang khan darkar 24 chhung shutdown kalpuiin, shutdown an kalpui chhan hi Meitei police mite'n buaina an siam ṭhin an duh lohna lantir nan leh, Kuki-Zo district aṭanga Meitei police mite zawng zawng lak chhuah an nih theihna tur atana an phutna a ni. CoTU leh ITLF te hian sorkar laipui chu Moreh leh a chhehvela tribal awmna khua aṭanga Meitei police bakah Meitei commando te la chhuak vek turin hian an hriattir a, lak chhuah an nih hma chuan remna leh muanna tluantling a awm theih loh tur thu an sawi a ni. Anni bakah hian Kuki Inpi Sadar Hills (KISH) pawhin Arambai Tenggol, Meitei Leepun leh Manipur Police commando te'n Kuki-Zo mipuite laka tharum an thawh ṭhin chu an dem thu an sawi ve bawk.

Tribal pawlte hian kawngpuiah lung leh alkatra bur chhiate dahin, state chhunga kawngpui pawimawh ber, Imphal-Dimapur kawngpui an dang a ni. Kangpokpi-ah hian dawr leh sumdawnna hmun zawng zawng khara tihtawp vek a ni a, National Highway-2 ah hian lirthei engmah tlan phal loin an dang a ni. CoTU information & publicity secretary, Thangtinlen Haokip chuan ITLF te nena an lungawi lohna lantir a, tribal chenna hmuna shutdown an kalpui chu loh theih loh thil a nih thu leh, Moreh aṭanga Meitei police te la chhuak a, Indian Army-te'n an hna ṭha taka an thawh theih nana Amit Shah hnena AFSPA hmang leh tura an nawr thu a tarlang a ni.

CBI-in thubuai pahnih theh lut

Central Bureau of Investigation (CBI) chuan Manipur-a buaina pahnih chhuak chungchanga inhnamhnawih nia hriat mi panga lakah Court of Chief Judicial Magistrate Kamrup (M), Guwahati (Assam)-ah thubuai an theh lut.

Manipur sorkar ngenna angin CBI-te hian August 23, 2023 khan heng buaina pahnihte hi an chhui chiang a ni. Thubuai pakhat hi July 8, 2023-a Imphal police hnena complaint lut a ni a, he thubuaiah hian July 6, 2023-ah hmeichhe kum tling lo pakhat chu a hmeichhe remtihna tel loa neih luih tuma ru boah mipa kum tling lo pakhat chu puh a ni. Hetih lai vek hian mipa naupang pa hian Imphal west district-a Lamphel police station-ah complaint theh lut ve lehin, July 6, 2023 zingah hian a fapa kum 17 mi hian a biake nen in chhuahsanin a lo let leh tawh lo niin a sawi a, mipa naupang pa hian mi tute'n emaw a fapa hi an ru bo niin a tarlang a ni.

CBI-te chuan thubuai an chhui zuinaah July 6, 2023 zing hian mipa naupang hian bike hmang hian hmeichhe naupang hi tuition a kalna hmun aṭanga hruaiin, old Cachar road, Thas View point bulah mi tu tih hriat lohte'n lo tidingin an ru bo ta niin an tarlang. He mipa naupang leh hmeichhe naupang hi CBI te chuan anmahni hruai botute hian khawi hmunah emaw hruaiin an that ta niin an sawi bawk. He thubuaia inhnamhnawihna nei nia puh mi palite chu thubuai chhui zui lai hian man niin, an chungthu ngaihtuah tura hren an ni a, CBI-te hian chargesheet pahnih theh lutin, mi panga man an ni tawh a, thubuai hi chhui zui zel tur niin an tarlang.