Meghalaya : Remna inbiakna neih mek aṭangin HNLC inhnukdawk

Meghalaya sorkarin helpawl a khap zinga mi, Hynniewtrep National Liberation Council (HNLC) chuan remna nei tura state sorkar leh sorkar laipuite nena inbiakna an neih mek aṭangin an inhnukdawk tih an puang.

HNLC general secretary, Sainkupar Nongtraw chuan an thutlukna siam chu sorkar lam aṭanga tih tak takna a awm loh vang a nih thu sawiin, an thil phutte sorkarin a ngaihsak tawk lo niin a sawi. Nongtraw hian HNLC-in sorkar laipui hnena a thil phut chu January 16, 2021 khan Cheristerfied Thangkhiew (Fam) chuan a theh luh tawh thu sawiin, hei hi inbiakna kalpuitu, Sadon Blah chuan a bawhzui thu a sawi a ni.

HNLC-in thuchhuah an siamah hian sorkar chuan an thil phutte pawh an la ngaihtuah loh thu tarlangin, an thil phut zingah hian HNLC khapna hlih te a tel a,"HNLC khapna siam hian inremna nei tura inbiakna neih meka kan tel pawh a huam tel a ni. Inbiakna ṭha tak nei tur chuan khapna hi an hlih a ngai," tiin an tarlang. Hei bakah hian an hruaitu laka thubuai theh luh zawng zawng pawh sut vek turin an phut bawk a, HNLC mi leh sa, tan ina tang mekte chhuah vek bakah, him taka an haw theihna tur ngaihtuah turin sorkar hi an phut bawk a ni. Nongtraw chuan heng an thil phut panga zinga pahnih chauh hi sorkarin an la tihhlawhtlinsak thu a tarlang bawk. HNLC hian sorkar nena inbiakna nei tura an hruaitu leh Personal Security Officer te inlan chu thil hlauhawm tak a nih thu te, chuti chunga sorkarin an thil phutte a tihlawhtling lo a nih chuan an tan chuan tharum thawha chet chhuah leh mai a ṭul tur thu te an tarlang bawk a ni.