Assam : Bus leh truck insu-ah mi 12 thi, hliam tuar mi 25 awm

Assam, Golaghat district-a Balijan area-ah nimin zing khan bus leh truck insuin, chetsualna thlenna hmunah hian mi 12 an thi a, mi 25-in hliam an tuar niin police-te chuan an sawi. Bus-ah hian picnic tura kalte chuangin, truck hi lungalhthei phur niin an tarlang.

Golaghat district Superintendent of Police, Rajen Singh chuan chetsualna hi zing dar 5 vela thleng niin a sawi a,"Mihring phura tlan bus hi Kamarbandha aṭanga Tilinga Mandir lam pana tlan a ni a, Jorhat lam aṭanga lo tlan truck nen hian an insu ta a ni. Ruang 10 lak chhuah tawh a ni a, heng ruangte hi Dergaon CHC-ah thawn niin, hliam tuar mi 27 te chu Jorhat medical college leh hospital-ah phurh an ni a, hetah hian mi pahnih hi an hliam tuar loin an thi ve leh a ni," a ti. Police-te chuan bus-ah hian mi 45 an chuang niin an sawi.

Assam-a chetsualna thleng avang hian Prime Minister Narendra Modi chuan motor chetsualna avanga nunna chan an awm chu pawi a tih thu sawiin, zawngnadawmna pek a nih tur thu puangin,"Mitthi chhungte hnenah Rs. nuai 2 ṭheuh pek a ni anga. hliam tuarte hnenah Rs. 50,000 ṭheuh pek a ni bawk ang. Heng pawisa hi Prime Minister's National Relief Fund aṭanga pek a ni ang," tiin X-ah a tarlang.