Manipur : Lilong-a inkahna chhui chiang tur SIT din

Manipur sorkar chuan Lilong Chingjao khuaa inkahna thleng chungchang chhui chiang turin Special Investigation Team (SIT) din a nih thu a puang. January 1 zana Lilong khuaa inkahna thleng avang hian mi panga an thi tawh a ni.

Thoubal Senior Superintendent of Police, Rakesh Balwal-a'n thuchhuah a siama tarlan a nih danin Lilong inkahna chhui chiang tur SIT hi Sub-Divisional Police Officer (SDPO) Md Riyajuddin Shah-a'n a kaihruai dawn a, ani bakah hian SDPO N Suresh Singh, Inspector Masood, Sub-Inspectors Md Anwar Hussain, S Bhubon Singh leh N Thomas Singh te chu panel member angin an tel bawk dawn a ni. An thil chhui report-te SP hnenah ni tin vawi hnih an pe ṭhin dawn a ni.

Hetih lai hian he inkahna avanga din Joint Action Committee (JAC) chuan invuina leh thlahna hun mumal tak hman a nih theih nan mitthi ruangte hi an tuam hlawm a ni. Mitthi te hi an vaiin Meitei Pangal an ni a, JAC hian vuina an buatsaihah hian mi 5,000 chuang an pung khawm niin an tarlang. He inkahnaah hian Revolutionary People’s Front (RPF) te chuan mawhphurtu an nih thu an lo sawi tawh a ni.