Meghalaya : Sorkar laipui buatsaih ODOP-ah pathumna

Sorkar laipui hnuaia Department for Promotion of Industry and Internal Trade buatsaih, nikum chhunga India ram state hrang hranga zinga One District One Product (ODOP) hmalakna bawhzui ṭha thlan zingah Meghalaya chu a ti ṭha zual pathum zingah thlan niin, pathumna dinhmun a hauh.

Meghalaya chief minister, Conrad K. Sangma chuan an state-in lawmman an lak chu loneitute leh kut themthiam thil neite thawh rah a nih thu sawiin,"Ram chhung leh ram pawn thleng pawha an kut chhuakte pho chhuah tumin ṭhahnem an ngai em em a ni. ODOP lawmman hial kan dawng ta hi mumal taka hmalakna kan neih vang te, danglam taka thil siam chhuah kan neih vang te, Geographic Indication (GI) tag vang leh hralh chhuah lama kawng kan hawn ṭhat vang a ni," a ti. Lawmman dawngtu, Commissioner and Secreatry, Dr. Vijay Kumar D pawhin an state mipuite thawhrimna leh thlai thar thawn leh hralh chhuah lama hmasawnna nei tura ruahmanna an siam te, khawvel huap pawha an thar chhuah te hralh thei tura an buatsaih ṭhin chuan ODOP lawmman chu a dawntir niin a sawi ve bawk.

ODOP hi sorkar laipuiin state hrang hrangte intihsiakna atana a buatsaih, state pakhata district tinin anmahni puala thil thar leh siamchhuah an neih theihna tura buatsaih a ni. Kum 2023 chhunga ODOP hnuaia hma la ṭha lawmman semna hi Delhi-a Pragati Maiden-ah neih niin, Aaatmanirbhar Bharat Utsav nen hman kawp a ni a, he hun hi External Affairs Minister (EAM), S. Jaishankar chuan a hawng a ni.