Nagaland : RPP-in sorkar laipuiin FMR tihtawp an tum dodal a ṭul thu sawi

Nagaland-a Rising People's Party (RPP) chuan sorkar laipuiin India leh Myanmar inrinaa Free Movement Regime (FMR) hman mek titawp a, ramri hungna siam a tum chu Naga mipuite kai thotu ni tura a duh thu leh, Nagaland-a sorkar lai, NDPP-BJP thawk dun sorkar chuan an dodal a ṭul tih an puang.

RPP chuan thuchhuah siamin,"Northeast-a tribal state te leh Naga mipuite tan chuan kum thar hi vanduainain a inṭan a ni. Sorkar laipuiin FMR titawp a, ram pahnihte inkara a khawi lam zawk pawhin lehlam ram km 16 chin zalen taka ka va inkalpawh theihna hi tihtawp a tum hi Naga mipuite tan harh chhuahna tur a ni. A ṭul a nih chuan kan MLA 60 te zawng zawng hian Prime Minister emaw Home Minister hi an hmu mai tur a ni a, Naga mipuite hian engtikah mah ramri hungna siam hi kan phal ngai dawn lo tih hi an hriattir tur a ni," tiin an tarlang. Naga mipuite inṭhen darh nasa sa tak leh ram leilungin a zir loh avanga awm darh tak an nih thu te, visa lak a ngai tawh tur leh venhimna khauh zawk hmanga ramri ven a nih chuan an hnam an darh zual tur thu te RPP hian sawiin, eng political party pawh ni se, anmahni ṭhen darh tumtu chu beih let a ṭul thu an sawi a ni.

RPP hian Prime Minister Narendra Modi hnenah ngenna siamin, Naga emaw, Zo-Kuki pawh ni se, kum tam tak, an thlahtute aṭanga an lo nunho tawh dan chu zahsak a, kum tam tak kalpui tawh, FMR chu titawp lo turin an ngen a ni. RPP chuan Manipur chief minister N.Biren Singh-a ngaihdan leh thlei bik nei rilru put hmang avanga sorkar laipuiin FMR an tihtawp a ṭul lo tiin an tarlang bawk.