Meghalaya Games vawi 5-na anthem tur tlangzarh

Meghalaya sorkar chuan January 15-20, 2024 chhunga Tura, West Garo hills-a neih tur, Meghalaya games atana anthem tur tlangzarhin, Shillong-a awm, Summersalt leh Tura-a NOKPANTE te thawh dunna hla, 'Here We Play' tih chu hman a nih tur thu an puang. Anthem hi English, Khasi, Garo, leh Pnar ṭawng hmangtu hnamte ziarang la khawma siam a nih thu Meghalaya sorkar chuan an tarlang.

Anthem tlangzarhna hun hi Tura-ah neih niin Meghalaya Sports & Youth Affairs minister, Shakliar Warjri chuan,"Anthem hian inpekna, inpumkhatna leh tumruhna, Meghalaya games-in a tum ber chu a phochhuak a ni. Kan chief minister hma thlir ber pawh a ni a, hei hian infiamna hmanga mihring inpawhna a siamte chu a huam a ni. Kan state-a infiammi naupang tak takte tihphur leh chawk tho tur rimawi an siam theih avang hian Summersalt leh NOKPANTE te an chhuanawm tak zet a ni," a ti.

Anthem hla thu hi Summersalt-a Kit Shangpliang leh NOKPANTE-a Mikhael Marak te buatsaih niin, a thluk hi Augustine Kurbah siam a ni. Shangpliang chuan band anga tun hma pawha hetiang ang an lo buatsaih tawh ṭhin thu leh tun ṭuma an anthem buatsaih erawh an thawhrim bik thu sawiin, NOKPANTE nena an thawk dun thei leh Meghalaya games buatsaihtute'n an ring ngam chu lawmawm a tih thu a sawi tel bawk.

'Here We Play' hi Meghalaya games 2024 neih chhung zawngin play tur a ni dawn a, medal ceremony lai pawha play tura ruahman a ni.

Meghalaya games hi ṭum li neih tawh a ni a, state chhunga infiammi 3,000 zet tan, infiamna chi hrang hrang 19-ah intihsiakna buatsaih a lo ni tawh a ni. Kumin Meghalaya games hi a vawi 5-na tur niin, Shillong pawn lama an neih hmasak ber tur a ni bawk a, India President, Droupadi Murmu-i'n a hawng ang.